ياخوي عندي حمل فوك الجتف هادله
أنطيه قلبي تره وحتى العمر هادله
وشو وكتي جاير علي حتى الهدم هادله
وما يوم مره الفرح يسري عله بابي ويمر
وحتى الحلو من اكله صار ابلهاتي يمر
ألجان حدري كبل صاير يصيح ويامر
وكمت اني انخه علي هلبت يح هادله
+++++++
اشكر الله من حبك طيباني
والمسك احلا منه طيب اني
لا تنشد شحالي طيب اني
ومسيت كلك حلم وبداخلي وهم
المن احبا بعد المن اعشك وهم
والفلم كله احترك وانا احترك وهم
كسرو خاطري ولا بضماد طيبوني
++++++
جم دوب اضل كاس الصبر متجرعة وشاربه
ولسان يحجي فلا يسكت اضن شاربه
والي تضن بي خير يطلع بالعكس شاربه
واكره معاش الذل وهو بيمن
خيف ولا اكول كلبي ويرتجي بيمن
كل لبن الاجواد اتعلك بعد بيمن
من حيث بالموس كصه من الاصل شاربه
++++++
يبن الزمن أركظت ياهو العلي حالك
بدلت نور النهار أبليل غم حالك
مو يَزي وياي لعبك ما طلع حالك
وجهين الك يا وجه عندك صبح حالي
صاحب الوجهين هواللي ضهد حالي
لو شافني با لدرب يبجي لعد حالي
او من يجزي خطوه يكول أنكـس بعد حالك
++++++
حزنان وحك رب العرش والايات
وروحي بمغاره صفت صحتلها والايات
لاذيجه ضلت الي لا هايه ولا ايات
ونيران هذا الكلب ياصاحبي لاهبه
مثل حر الشمس بلصيف كلش لاهبه
بس امي حنت علي لا انت لا هبه
ونزل دمعي يا صاح غركن ولايات
++++++
جم حيل الوكت وعن المحبه بطل
وجم جبان وردي سـَوته الدنيه بطل
كل سحر لومه سحرك بروحي بطل
من حيث طعمه شهد لو بالكلب خمره
محبوبي سبع الدجى وشعره السرح خمره
أنه من اشوفه ارتبك وأسكر بلا خمره
ولشافني من الخلكـ حسباله شارب بطل
++++++
روحي التحبك صدك عشكت عشك ياهله
وكليبي من شوفتك فز وصرخ ياهله
عمري بغيابك عسر كلي عكبك ياهو اله
متعود لشوفتك يوميه ابوسك وشم
وحتار من وصفك عشكك بروحي وشم
ضل عالي صرحك صفه شامخ بعزك وشم
والكون كله وطي نعنعله ابو ياهله
++++++
ضاع الصدك والجذب وحنه بمتاه نسر
دنيانه صارت عكس صرنه نجرة نسر
واسرارنه اتطشرت بيمن نامن نسر
وبدروس هذا الوكت كل الربع صاقطه
وبعيوني اني شفت غتره بوحل صاقطه
وصاحبها شارب خمر غافي بحضن صاقطه
وساحلته من شاربه اليوكف عليه النسر
++++++
من خان ما بس رحل كلبي معاهم وجر
والزين لمن طحت ماهمه بية وجر
مرفوع كول ولفض منصوب هسة وجر
والخان لازم يرد لازم نردلة الحزن
بسيوف حزن علي لازم عليهم حزن
او وزني من الغضب علكون ضعفة حزن
جي لنة ولفي غدر دلالي بية وجر
